Abşeron rayonunun Novxanı kəndində yerləşən bu məscidin inşa tarixi 1912-ci ilə aiddir. Ümumi sahəsi 45x58 metr, ibadət zalının sahəsi isə 16x20 metrdir. Kvadrat şəklinə malik məscidin ön tərəfində dörd kitabə var. Məscidin minarəsi dəmir- betondan inşa olunub və hündürlüyü 31 metrdir.

Hacı Səfərəli məscidi iki hissəyə-kişilər və qadınlar şöbəsinə ayrılıb. Qadınlar şöbəsi birinci və ikinci mərtəbədə yerləşib. Məscidin döşəməsindən günbəzədək hündürlüyü 11 metrdir. Məscidin içərisində dörd sütun vardır. Sütunları tağlar bir-biri ilə əlaqələndirir. Günbəz də sanki sütunların üzərində qərar tutub. Günbəz hissədə səkkiz kvadrat şəkilli pəncərə var.

Bu məscidi kənd sakini, varlı və dindar bir adam olan Hacı Səfərəli tikdirib. Sovet hakimiyyəti illərində məscid bağlanaraq anbar kimi istifadə olunub və 1987-ci ildə yenidən fəaliyyətə başlayıb.

Azərbaycan Respublikası məscidlərinin ensiklopediyası