Salavat dağ keçidini nəzarət altında saxlayan Əniq (Enıq) qalası dəniz səviyyəsindən 1100 m hündürlükdə, Qusarçayın sağ sahilində, Qusar rayonunun eyni adlı kəndində təbii maneələrə malik, hündür təpə üzərində yerləşir. Qalanın müdafiə qabiliyyətini daha yaxşı təmin etmək üçün memar relyefin bütün imkanlarından uğurla istifadə etmişdir. Qala uçurumlu ətəkləri olan nəhəng təpənin cənubunda salınmışdır. Nə vaxtsa möhtəşəm istehkam olmuş bu qaladan iki qalıq salamat qalmışdır. Birinci halda divarın uzunluğu 15-16 m-dir. İkinci qalıq isə qala darvazasının künc bürcüdür. Divarın eni 2 m, bürcün diametri isə 6 m-ə yaxındır. Qalıqların hündürlüyü 5,8 m-dən 9,3 m-ə qədərdir. Qala yeri qaya daşlarından və çaydaşından inşa olunmuşdur (C.Ə.Xəlilov, 1962). Gürcü "Xronoqrafi"nın (XIV əsr) məlumatı əsasında Əniq qalasının 1288-ci ildə dağıdıldığı ehtimal olunur.

Vəli Baxışəliyev Azərbaycan arxeologiyası